香港新浪網 MySinaBlog
*♡♡小肥豬♡♡* | 6th Jan 2008 | 生活點滴 | (10 Reads)

拎左攝影公司幫我影結婚當日相片都有好幾個星期,不過懶懶嘅小肥豬一直都未去晒番D相出嚟,因為有好多相個景都係差唔多,要揀晒邊張靚先晒嘛!

一直都打算遲少少...遲少少...,就遲到仲未開始揀,終於俾小豬爸吹,要我星期六前攪好,因為星期六祖母生日,要我拎埋相俾其他親友呀!

俾小豬爸吹吓,咁就開始展開依個既開心又煩惱嘅工作啦!

不過就係因為開始左依個工作,我發現左少少野,想請大家幫個忙呀!

基本上有好多個造型攝影師都有幫我地影,不過就因為去到酒樓之後,攝影師去左休息時,我換好晒衫,見仲有時間就請有帶專業相機嘅兄弟幫我地影住相先啦。

依幾張相我都好鐘意呀(我地個大會攝影師又冇幫我影過依幾個景同酒樓掛嘅合照呀!),不過就有一個問題....就係影出嚟黑左少少呀,但我又好想晒埋出嚟,放入相簿,因為都為係一個紀念嘛!

我自己唔識執相,對PHOTOSHOP完全唔識,上網找左一D軟件整又唔得,所以就想請大家幫忙,有冇人可以幫我解決依個問題呀? 或者有冇人可以介紹又平又靚又正嘅執相地方俾我呀?


*♡♡小肥豬♡♡* | 5th Jan 2008 | 生活點滴 | (19 Reads)

今日係大肥豬婆婆生日,所以一放工就即刻走人,因為要趕入新界錦田陪老爺奶奶一齊入去食飯呀!(做個乖乖新抱仔呀~~哈哈)

其實除左食生日飯之外,我都仲有另一個目的,就係當我地結婚嗰時,因為婆婆行動唔太方便,所以冇出席我地個婚宴,冇向佢敬茶。今次就係賀壽之餘,補番敬茶啦!

原來婆婆已經九十歲,真係睇到唔似呀,仲好健壯。因為佢講潮州語,所以都唔係好知係講乜....哈哈~不過都應該唔係罵我呀!

成餐飯真係食得超飽,不過最攪笑就係佢地酒樓嘅甜品竟然係可以ORDER啫喱,真係第一次呀!

係臨走時我地同婆婆影張相啦!


*♡♡小肥豬♡♡* | 3rd Jan 2008 | 生活點滴 | (19 Reads)

DaisypathAnniversary Years Ticker

唔覺唔覺原來已經做左大肥豬太太一個月啦! 時間真係過得好似好快,係我腦入面仲不停浮現結婚嗰日發生嘅事,個感覺仲好似係尋日先發生。但原來已經一個月啦~~哈哈哈

其實依一個月嘅轉變都好似唔係太大,尤其係個心景上,好似仲未習慣做人老婆,人地叫我做吳太都唔識應。

最大分別就係唔可以成日見到屋企人,返工同放工嘅路程遠左、住嘅環境唔同左,有D生活習慣改變左....

唔知係唔係依家仲係同奶奶一齊住,有少少唔似新婚嘅感覺...個心情都幾奇怪。我諗新屋攪好左之後,有自己嘅二人世界,到時就會好唔同啦!

係依一個月我同大肥豬都好好....感覺上好甜蜜呀!係曾經試過有一次因新屋裝修問題嗌交,不過好快都冇事喲。其他嘅事佢都好就我,又幫我去識應係個暫住嘅環境,都仍然咁錫我....唔識形容,總之就係SWEET SWEET啦!

希望以後咁多個月都可以繼續咁SWEET SWEET啦!

今日因為大肥豬要開OT,所以冇得去慶祝呀!

不過唔緊要,如果兩個人開心,就日日都係紀念日,日日都可以慶祝啦!


*♡♡小肥豬♡♡* | 2nd Jan 2008 | 生活點滴 | (14 Reads)

經過除夕晚大昏迷之後,決定元旦日唔可以留係屋企,一定要出吓街,感受吓假期先得。

所以訓醒之後,就同大肥豬去行街街睇野啦!我地打算去睇吓D電器,所以就去左鑽石山廣場,因為知道嗰度有好幾間大型電器公司。

係未行商場時,大肥豬就提意同我去附近個南蓮園池影相。(其實都想去依個公園好耐,見好多BLOG友仔都影左好多靚相呀!)

入到個公園,真係覺得好靚,好有古典風味呀!不過唔知係唔係假期關係,有好多地方都關閉左唔入得去影相....所以我地行左一個圈,影左少少相就走啦!

之後我地就去睇電器啦!原來買電器都真係幾頭痛嘅事,又要睇吓夠唔夠位擺,又要睇吓個性能好唔好,最重要就睇吓邊間平D呀!

原本我地都係打算睇吓先,等新屋差唔多得先買。不過好多鋪頭都做緊新年大特價(仲要只係做元旦日),我地見咁抵,最後都買左洗衣機同雪櫃,因為真係平左好多呀!

為左買係兩樣野,我地都行左成個鐘先決定係邊間買,不停來回幾間電器鋪。因為D電器真係好海鮮價,間間都唔同呀!要去到最抵嗰間先買呀~(做一個合資格嘅師奶仔呀!)

買完兩樣電器,我地見有時間,知道吉之島又做大特價,所以我地就又再出發,睇吓有冇好野買啦!

竟然又俾我地買到野,就係睇買左張雙人床同床褥,其實我地已經睇中左張床褥好耐啦,咁見有特價就決定拍板買啦!

買埋依兩樣野,我地都倦到唔識形容,所以就係附近間目黑壽司食我地嘅元旦晚餐啦!係食嘅途中,唔知係唔係倦到傻左,我地兩個拎部相機出嚟不停影,連平時唔鐘意玩自拍嘅大肥豬都玩埋一份,依餐元旦晚餐真係好開心呀!

係返屋企途中,大肥豬又建議同我去APM影相。原來我地今年係未影過聖誕燈飾,所以當然就又嚟影..影....影啦!

雖然今年嘅元旦冇乜特別慶祝,不過都過左新一年好開心嘅第一天呀!希望之後日日都可以咁開心啦!


*♡♡小肥豬♡♡* | 1st Jan 2008 | 生活點滴 | (11 Reads)

尋晚係除夕夜,不過唔係太舒服,所以都唔係好想去街,好怕同人迫呀!

放工就同大肥豬去左屋企附近商場行左一陣,之後就好乖咁返屋企陪老爺奶奶食飯。

食完飯......睇左一陣電視,巡左一陣BLOG就大覺訓啦!

連倒數到睇唔到就訓到你死我活咁。唉.......我個除夕就咁渡過左啦!

雖然係咁,我都有一份除夕禮物收呀....

就係當我地行緊商場時,睇到一對BOOT做大特價,試左又幾舒服,又幾好睇哦,咁大肥豬就主動話買俾我啦! (哈哈~~~大肥豬又真係幾錫我呀!)

新一年就有新鞋著....好開心呀!


*♡♡小肥豬♡♡* | 1st Jan 2008 | 生活點滴 | (17 Reads)

    

 新一年已經來臨啦!

我地大小肥豬係度先祝各位係新一年樣樣事都係好,

將所有唔開心嘅事隨倒數時一齊忘記!

開開心心迎接新一年!

祝大家新年快樂,身體健康!

 

07年係我地嘅『好運年』,因為囍事齊齊嚟...

08年.....希望可以繼續KEEP住好運,繼續努力!

 

 


Previous